War kasoo baxay Jabhadda Amxaarada ee FANO ayaa lagu sheegay, in maleeshiyaadkooda ay gacanta ku dhigeen magaalada Saagooj ee Koonfurta Gonder.
La wareegitaanka kooxda ee magaaladaas ayaa yimid, kadib dagaal culus oo magaalada ku dhex maray ciidanka Xabashida Itoobiya iyo maleeshiyaadka Amxaarada ee FANO.
Muuqaal ay maleeshiyaadka kooxda iska soo duubay islamarkaana lagu baahiyay warbaahintooda ayaa muujinaya, ciidan katirsan FANO oo ku sugan gudaha Saagooj, iyo askartooda oo ku sugan aargada laga galo magaalada.
Dowladda Xabashida Itoobiya ayaanan illaa iyo hadda ka hadal warka kasoo baxay FANO ee ay ku sheegtay iney la wareegtay magaaladaan katirsan mandoqadda Gonder ee dalka Itoobiya.
Tani ayaa kusoo aadeysa iyadoo shalay maleeshiyaadka FANO ay weerar kan lamid ah ku qaadeen magaalada Qowraa ee udhaw xadka ay wadaagaan Itoobiya iyo Suudaan, waxaana ay kooxdu dagaalkaasi ka sheegatay guulo waaweyna, ayna ku qabsatay gaadiid iyo hub ay lahaayeen ciidanka Itoobiya.
