Isagoo ka hor hadlayay boqollaal ruux oo Itoobiyaan ah kadib markii uu Abiy Axmed ka laabtay safarkii uu ku yimid dhulka Soomaali-galbeed, ayuu sheegay iney ku tallaabsadeen guul ballaaran oo ah iney gacanta ku dhigeen marin badeed ay shacabka Itoobiya leeyihiin, taasoo uu sheegay iney tahay guul weyn laakiin aaney siday tahay u dareemeynin dadka Itoobiyaanka ah.
Wuxuu sheegay in guusha uu soo hooyay xisbigiisa ee la xiriirta inuu gacanta ku dhigay bad ay Soomaali leedahay, uu lamid yahay xawaaraha ay diyaaraddu ku socoto, taasoo aaney aad u dareemeynin dadka saaran, balse ay arki karaan dadka diyaaradda banaanka ka daawanaya.
Ra’iisul wasaaraha Itoobiya Abiy Axmed ayaa sheegay in la wareegitaanka marin biyoodka ay tahay mid ka qeyb qaadaneysa horumarka dhaqaale ee dalka Itoobiya, isagoo sheegay in looga baahanyahay dadka Itoobiyaanka ah iney dulqaad iyo samir yeeshaan, mudo aan fogeynna ay indhahooda ku arki doonaan horumarka Itoobiya.
Hadalka Abiy Axmed ayaa kusoo aadaya iyadoo dhawaan dowladda Federaalka ay sheegtay, in diblumaasiyad iyo wadahadal ay ku dhameysay khilaafkii kala dhexeeyay Itoobiya ee salka ku hayay badda Soomaaliya, waxaana hadda Itoobiya loo ballanqaaday in waqtiyada nasoo aadan si rasmi ah loogu xalaaleyn doono qaadashada badda Soomaaliya.
