Saacaddu markii ay ahayd 11:15 waqtiga Filastiin, waxaa Marinka Qazza ka dhaqangalay heshiiska Xabad joojinta, ee ay saddex maalin gaareen Kooxaha Muqaawamada iyo Kayaanka Sahyuuniga ah.
Aroornimadii hore ee maanta ayay dadku billaabeen iney dabaaldegaan, oo ay si muuqata isugu soo baxaan, iyagoo takbiirsanaya, bogaadinaya sumuudka iyo sabarka ay muujiyeen, si gaar ahna ugu mahadcelinaya wiilashooda wax iska caabinta, ee kudhawaad shanta boqol ee maalmood la sabartamayay cadowga Sahyuuniyadda.
Muuqaallo iyo mashaahid ka tarjumaya farxadda dadka Muslimiinta ah ee Qazza, kuwaasoo shaki la’aan anaguna aan la qeybsaneyno oo aan la farxeyno, ayaa baraha Internetka sida mowjadaha oo kale u qasbaday, aadna la iskula dhexmarayaa, warbaahinta kasoo warameysa Marinka Qazzana ay soo tabinayaan, si gaar ah telefeshinka laga leeyahay Qadar ee Aljazeera.
